از زبان حضرت  سیدا لشهدا " علیه السلام " خطاب به حضرت عباس (ع)

دور ای دعوالر اصلانی

ابوالفضلیم، علمداریم

آخان سو تک قیزیل قانی

ابوالفضلیم، علمداریم

 

دئیم دوتمیر دیلیم قارداش

دور ای آرخام، ائلیم قارداش

سینوب سنسیز بئلیم قارداش

ابوالفضلیم، علمداریم

 

کسوب دشمن یولین آخر

سالوب ساق و صولین آخر

نه باش وار، نه قولین آخر

ابوالفضلیم، علمداریم

 

عملداریم زبون اولدون

قتیل قوم دون اولدون

علم تک سرنگون اولدون

ابوالفضلیم، علمداریم

 

اوغول یوخ دردیمی بولسون

منه یار و معین اولسون

اوغولسیز قارداشین اؤلسون

ابوالفضلیم، علمداریم

 

توکندی طاقتیم سنسیز

بوکولدی قامتیم سنسیز

قان آغلار عترتیم سنسیز

ابوالفضلیم، علمداریم

 

اؤزین مقصودیوه یئتدون

بئله احبابی ترک ائتدون

منی یالقوز قویوب گئتدون

ابوالفضلیم، علمداریم

 

ایا ماه بنی‌هاشم

منیم ایستکلی قارداشیم

دؤنوب آلقانه گؤز یاشیم

ابوالفضلیم، علمداریم

 

دئسم گورمز گؤزیم قارداش

یقین دوزدور سؤزوم قارداش

سنه قربان اؤزیم قارداش

ابوالفضلیم، علمداریم

 

اوزون گئتدون خلاص اولدون

دلی پیمانه تک دولدون

گلستانیم نه تئز سولدون

ابوالفضلیم، علمداریم

 

سنی کیم غرق ائدوب قانه

سالوب بو قانلی میدانه

یانار بو حاله بیگانه

ابوالفضلیم ، علمداریم

 

بو غربتده وحید اولدوم

کؤمکدن ناامید اولدوم

سن اؤلدون من شهید اولدوم

ابوالفضلیم ، علمداریم

 

قالوب صرّاف بیچاره

محیط غمده آواره

اؤزین قیل دردینه چاره

ابوالفضلیم، علمداریم